អាវុធហត្ថរាជធានីភ្នំពេញ អំពាវនាវដល់មហាជន ឱ្យជួយសហការផ្តល់ព័ត៌មានអំពីបទល្មើសគ្រប់ប្រភេទដល់សមត្ថកិច្ច ជាពិសេស ករណីចោរឆក់
04-December-2019 | ដោយ ពលមនសិការ
ភ្នំពេញ៖ នៅព្រឹកថ្ងៃទី០៤ ខែធ្នូ ឆ្នាំ២០១៩ សមត្ថកិច្ចជំនាញ នៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ បានបញ្ជូនជនសង្ស័យ០២នាក់ ទៅតុលាការ ដើម្បីផ្តន្ទាទោសតាមច្បាប់ ក្រោមការចោទប្រកាន់ពីបទ លួចមានស្ថានទម្ងន់ទោស(ឆក់កាបូប)។
សមត្ថកិច្ចបានឲ្យដឹងថាជនសង្ស័យ១-ឈ្មោះ ចំរើន វាសនា ហៅខ្មៅ ភេទប្រុស អាយុ២១ឆ្នាំ ត្រូវបានកម្លាំងល្បាតមូលដ្ឋានអាវុធហត្ថខណ្ឌដូនពេញ ឃាត់ខ្លួននៅចំណុច ផ្លូវ១៤៤ កែងផ្លូវនរោត្តម សង្កាត់ផ្សារកណ្តាល២ ខណ្ឌដូនពេញ រាជធានីភ្នំពេញ, ទី២-ឈ្មោះ មាស វាសនា ហៅង៉ោល ភេទប្រុស អាយុ១៧ឆ្នាំ ត្រូវបានសមត្ថកិច្ចជំនាញនៃការិយាល័យស្រាវជ្រាវបទល្មើសព្រហ្មទណ្ឌ កងរាជអាវុធហត្ថរាជធានីភ្នំពេញ សហការជាមួយកម្លាំងមូលដ្ឋានអាវុធហត្ថខណ្ឌព្រែកព្នៅ ឃាត់ខ្លួន នៅចំណុចឃ្លាំងលើ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ។
ជនសង្ស័យទាំង២នាក់ខាងលើ បានធ្វើសកម្មភាពឆក់ កាបូប ពីប្រជាពលរដ្ឋដែលកំពុងធ្វើដំណើរលើដងផ្លូវបានសម្រេច នៅវេលាម៉ោង០៣នឹង២០នាទីទៀបភ្លឺ ថ្ងៃទី២៩ ខែវិច្ឆិកា ឆ្នាំ២០១៩ ប៉ុន្តែជនសង្ស័យម្នាក់ត្រូវបានឃាត់ខ្លួនភ្លាមៗបន្ទាប់ពីសកម្មភាពឆក់រួច និង ម្នាក់ទៀតត្រូវបានឃាត់ខ្លួនក្នុងថ្ងៃបន្ទាប់ តាមរយៈការសហការណ៍គ្នារបស់សមត្ថកិច្ច ប្រឹងប្រែងស្រាវជ្រាវ តាមដាន និងពួនស្ទាក់ អស់រយៈពេល១យប់១ថ្ងៃ។ ជនសង្ស័យទាំង ០២នាក់ ខាងលើ បានសារភាពចំពោះមុខសមត្ថកិច្ចអាវុធហត្ថឲ្យដឹងថា កន្លងមករូបគេ ធ្លាប់ប្រើប្រាស់គ្រឿងញៀន ជាប្រចាំថ្ងៃ រយៈពេល ០១ឆ្នាំមកហើយ។
ទន្ទឹមជាមួយគ្នានេះផងដែរ សមត្ថកិច្ចជំនាញ របស់កងរាជអាវុធហត្ថរាជធានីភ្នំពេញ បានបង្ហើបឲ្យដឹងថា រាល់ការស្រាវជ្រាវនិងបង្ក្រាបបទល្មើសបានសម្រេចនិងទាន់ពេលវេលា គឺអាស្រ័យលើព័ត៌មានជាសំខាន់ ដូច្នេះសមត្ថកិច្ចសូមអំពាវនាវដល់មហាជន មេត្តាជួយផ្តល់ពត៌មាននិងដាក់ពាក្យបណ្តឹងគ្រប់ពេលវេលាដែលមានបទល្មើសកើតឡើង ដើម្បីជាទុនដល់សមត្ថកិច្ច ក្នុងការស្រាវជ្រាវ និងបង្ក្រាប ព្រោះសមត្ថកិច្ចមិនអាចដឹងហេតុការណ៍គ្រប់រឿងគ្រប់ពេលបានទេ បើគ្មានការសហការពីមហាជនក៏ដូចជាជនរងគ្រោះនោះ ៕
ចំនួនអ្នកទស្សនា
- ថ្ងៃនេះ17441
- ម្សិលមិញ15681
- សប្តាហ៍នេះ76281
- ខែនេះ98161
- ឆ្នាំនេះ98161
- សរុប20540617